فى البداية تحذير ما دايرة نووووووووووووووووووووهائى زول من ناس ابو قميج يجى داخل بى هنا
ود التجانى ابو خالد وابو مازن وابو الغائب وبقية العقد الفريد
المناسبات السودانية فيها العجب العجيب واشكال وانواع من النسوان ، وعلى رأسها ناس الشمارات ، ومجموعة الاستعراض والفشخرة والبوبار ، والعجب كمان البحشروا نخرتم فى اى شئ ويدخلوا فى الخصوصيات الحساسة ديييييييك لمن يجيكى صداع ، اها ابدأ بى ناس الشمارات وديل قاعدين بكونوا فى رصة كده معينة وقاعدين للتعليق فى الداخل والمارق
ودى منو وداك منو
وديل اهل العريس وسجمى يايمة العريس قالوا كبير وتحت تحت معرس لكن عندو قروش
هى لكن البت دى ما صغيرة مالن يجدعوها لى راجل قدر ابوها برى يايمة
اها تجى واحدة تقعد جمبهم عويج الخشم ورفيع الحواجب اها العاباية دى من وين والتوب ده من والشبط ده من وين ومالو عااالى كدى ، هى العباية دى شفتا فلانة لابسة زيييييييييها بس ياها ذاتا ، وتانى يقبلوا على الاكل بعد خلوا الناس يا شكرهو والطباخ قالوا اكلوا سمح ولا برى يايمة الاكل مسييييييييييييييخ وكعب
اها تانى الجزئية حقت الفشخرة وتبدا بى المدارس الخاصة والسنة بى كم والسنة دى طالعين رحلة القاهرة وقالوا هناك الادوات المنزلية الفخمة هناك رخيصة ، وتانى التوب ده طرزتو عند ناس المحل الفلانى اصلهم ديل عندهم احسن تطريز ، اها نجى لى ديكور البيت والاناتيك والتحف
يلا ناس البحشوا انفهم فى اى كلام يبدوها ما شاء الله يافلانة ولدك كبر مالك ماجبتى رفيقو ،ولمن تردى هى انا ماشاء الله عندى غيرو ولو الله ادا العمر غيرو بجى مافى داعى للعجلة ن الواحدة تعوج خشما وتقول ليك لالالا يااختى الولادة صغرة والمشى صباح ، يعنى شعارن الولادة الواحدة تخليكى تشكى كأنك بقيتى عقيم ، وتانى اها مالك ضعفتى كدى ، تردى تقولى بإختصار كده احسن ترد تقول ليك برى يايمة الضعفة ماسمحة هسى الراجل المرة الضعيفة بتملأ عينو ، غايتو جنس حال ، العجب ناس القطيعة والحسادة الواحدة بالله لمن تشوفك وشها يجيب مليون لون
الكلام لسه ما خلص